БИШКЕК, 24-сен. — Sputnik. Билим берүү жана илим министрлигине элдин ишеними артууда. Тагыраагы, ишеним индекси өткөн жылга салыштырмалуу жети пайызга жогорулады. Бул тууралуу аталган ведомстводон билдиришти.
Маалыматка караганда, 2020-жылдын биринчи жарым жылдыгынын жыйынтыгы боюнча, Билим берүү министрлиги ведомстволордун арасынан үчүнчү орунга чыккан.
"Быйыл элдин ишеними 37,7 пайызга көтөрүлдү. Бул өткөн жылга салыштырмалуу 7 пайызга жогорулады дегенди билдирет. 2019-жылдын аягында министрлик ишеним индекси боюнча 4-орунда эле", — деп айтылат маалыматта.
Белгилей кетсек, Улуттук статистика комитети 2012-жылдан тартып 3,6 миң жаранды сурамжылоонун негизинде "Калктын ишеним индексин" түзөт. Жооптордун негизинде мамлекеттик органдардын ишмердүүлүгү, сапаты, жарандар менен өз ара кызматташуусу аныкталат.
"Калктын ишеним индекси" үч негизги индекстен турат:
- жарандын мамлекетке болгон жеке ишеними;
- жарандардын аткаруу бийлигиндеги коррупциянын деңгээли жөнүндөгү жеке түшүнүгү;
- бийлик органдарынын ишмердүүлүгүн жумуштун сапатына жараша баалоосу.