БИШКЕК, 10-сен. — Sputnik. Милдеттүү медициналык камсыздандыруу фонду медицина кызматкерлерине август айындагы эмгеги үчүн 269,2 миллион сом кошумча маяна төлөйт. Бул туурасында Саламаттык сактоо министрлигинин маалымат кызматы билдирди.
Аталган сумма өлкөдө коронавирус менен күрөшүп жүргөн 15 785 медикке берилет.
Эми акча берилбейби? Медиктерге компенсация төлөөнүн шарты өзгөрүүдө
Анын ичинен аймактарга төмөнкүдөй бөлүнгөн:
- Бишкек шаары — 63 миллион 374,2 миң сом;
- Чүй облусу — 29 миллион 874,5 миң сом;
- Ош облусу — 62 миллион 550,7 сом;
- Баткен облусу — 19 миллион 686,7 миң сом;
- Жалал-Абад облусу — 37 миллион 272,9 сом;
- Ысык-Көл облусу — 29 миллион 710,9 сом;
- Нарын облусу — 15 миллион 605,1 сом;
- Талас облусу — 10 миллион 814,4 сом.
Белгилей кетсек, өкмөт республикалык бюджеттен COVID-19ду ооздуктоо үчүн тартылган медицина кызматкерлерине кошумча маяна төлөө үчүн 2020-жылга 640 миллион сом бөлүнгөн. Анын 540 миллиону Милдеттүү медициналык камсыздандыруу фондуна, 100 миллион сому Саламаттык сактоо министрлигине берилген.