Жаңы окуу жылы башталып, 156 миң бөбөк алгачкы ирет мектеп босогосун аттады. Алар билимди үйдөн эмес, мектепке барып алышат.
Буга байланыштуу "Жол эрежеси" боюнча рубриканын алкагында Sputnik Кыргызстан агенттиги ЖКККББнын ата-энелерге берген кеңештерин жарыялоону эп көрдү.
Ата-эне биле жүрчү 9 эреже:
- Балаңыз менен көчөгө чыкканда анын колун бекем кармаңыз;
- Бала жол эрежесин, мектепке барчу маршрутун так үйрөнүп алышы үчүн алар менен бир нече ирет мектепке чогуу барыңыз. Бул учурда ар бир белгини көрсөтүп, жолдон өтүү, анда жүрүү эрежелери тууралуу айтып, көрсөтүп беришиңиз зарыл;
- Жолдо тротуар же атайын жөө адамдар өтүүчү жерлер менен гана жүрүү керек. Колдон келсе көчөнүн оң жак тарабы менен баскан оң. Эгер андай шарт жок болсо, жолдун сол тарабы менен унаа каттамына карама-каршы карай баскыла. Мындай шартта айдоочулар сизди, сиздер унааны көрө аласыздар;
- Көчөнү кесип өтүүдө жол чыракка көңүл буруу шарт. Жашыл күйгөндө гана өтүш керек. Болбосо жөө адамдар өтүүчү чийинге барыңыз. Жол чийинге келгенде дароо эле өтүп кетпей, унаалар ылдамдыгын азайтканына көз жеткенден кийин гана кыймылды башташ керек. Алгач сол жагын карап биринчи катардагы унаалар токтогон соң кийинки катардагы машиналардын токтогонун көрүп туруп, анан өтүү зарыл. Андан соң оң жагындагы унааларды сөзсүз карап өтүңүз. Ошондой эле баланы алдыга коё бербей, артка калтырып салбай жанаша басканы дурус;
- Жолдо автоунаа токтогондо биринчи улуу адамдар түшүүсү керек. Эгер бала биринчи түшүп кетсе, ал күтүлбөгөн жерден жолго чыгып кетиши ыктымал;
- Автобустан түшкөндө дароо жолдон өтүп кетүүгө аракет кылбаңыз. Биринчи коомдук транспорт өтүп кетсин. Ошондо жолдун эки тарабы бирдей көрүнөт. Автобусту алдынан да, артынан да айланып өтүү кооптуу экендигин унутпаңыз. Анткени ал жерден дагы бир башка унаа чыгып калышы мүмкүн;
- Жаан, кар жааган учурда жолду кесип өтүү өзгөчө көңүл бурууну талап кылат. Анткени аба ырайынын кесепетинен көрүү мүмкүнчүлүгү айдоочуда да, жөө жүргүнчүдө да төмөндөйт;
- Жолдо велосипедди 14 жаштан өткөн балдарга гана тебүүгө уруксат берилген;
- Жашы 12ге чейинки бөбөктөрдү автоунаа менен ташууда сөзсүз түрдө аларды коргоочу жабдыктар болушу шарт. Колдон келсе атайын отургучтарды колдонуңуздар. Кокус жол кырсыгы катталып калса, жаракат алуу коркунучун төмөндөтөт.
Жадыбалдай жатта! Жол кырсыгына кабылган айдоочу көрө турган 5 чара
Кайгуул милициясы көчөдө эрежени так сактаган ата-эне балдарына үлгү боло турганын айтып, бөбөктөрдүн ден соолугун жана өмүрүн сактап калууда алар маанилүү роль ойной турганын эскертти.