БИШКЕК, 4-авг. — Sputnik. Чолпон-Атада түнкү клубдар жана кальян-барлар жабылат.Бул тууралуу өкмөттүн Ысык-Көл облусундагы ыйгарым укуктуу өкүлү Балбак Түлөбаев билдиргенин президенттин маалымат кызматы кабарлады.
Белгилей кетсек, мамлекет башчы Ысык-Көл облусуна жумушчу сапары менен барган. Жээнбеков жергиликтүү бийликти Ысык-Көл районунда, анын ичинде Чолпон-Ата шаарында вирустун жайылышын алдын алуу боюнча иштерди күчөтүүгө чакырган.
"Түлөбаев Ысык-Көл облусундагы эпидемиологиялык кырдаал турукташып баратканын, коронавирус жуктургандардын саны азайып жатканын белгиледи. Анын айтымында, Чолпон-Атада түнкү клубдар жана кальян-барлар жабылат. Ошондой эле ал пансионат ээлерине коопсуздук алгоритмин сактоо өтүнүчү менен кайрылганын, эгер эрежелер аткарылбай, тартип сакталбаса, пансионаттар да жабыларын эскерткенин айтты", — деп жазылат маалыматта.
Облус башчысы бүгүнкү күндө аталган аймакта медициналык аппараттар менен дары-дармектер жетиштүү экенин билдирип, Саламаттык сактоо министрлиги жардамга дарыгерлерди жибергенин кошумчалаган. Ал ыктыярчылар менен меценаттар да көмөк көрсөтүп жатканын белгилеген.