Ошто коронавирус жана пневмонияны дарылоо үчүн 600 орун даярдалды

6-июлдан баштап шаардын Кулатов кичи районундагы "Газпром" спорт комплексинде 100 орундуу стационар ишке кирди. Бул жайга жеңил жана орто абалдагы бейтаптар келип, жардам алышат.
Sputnik

БИШКЕК, 6-июл. — Sputnik. Ош шаарында коронавирус жана пневмонияны дарылоо үчүн 600дөй орун даярдалды. Бул тууралуу шаардык мэриянын маалымат кызматы кабарлады.


Билдирмеге ылайык, даярдык иштери менен калаа мэри Таалайбек Сарыбашов таанышып, бардык кырдаалга даяр болуу керектигин баса белгилеген.

"6-июлдан баштап шаардын Кулатов кичи районундагы "Газпром" спорт комплексинде 100 орундуу стационар ишке кирди. Бул жайга жеңил жана орто абалдагы бейтаптар келип, жардам алышат. Эгер кишинин саны көбөйсө, жогорку окуу жайдын жатаканасында 300 орун, "Андрос" жеке менчик медициналык борбору жана "Классик" мейманканасында 100дөн ашуун орун даярдалган", — деп айтылат маалыматта.

Мындан тышкары, Sun rise мейманканасына 50 орундуу обсервация камдалган.

Бишкекте ачылган күндүзгү стационарга өткөн суткада 1 734 адам кайрылган

"Ооруну алдын алуу максатында буга чейин эле орундарды даярдаганбыз. Дагы кошумча 500дөн ашуун орун уюштуруу каралып, жеке ишкерлер да жардам берип жатышат. Даярдалган орундар адамдарга толбосун. Өкмөт, ишкерлер тараптан керектүү аппараттар да берилүүдө. Элибиз дарыгерлер койгон талаптарды угуп, аткаруусун суранат элем", — деди Сарыбашов.

Ал эми Өзгөчө кырдаалдар министрлиги шаардагы "Каныкей" ресторанына да 50 орундуу күндүзгү стационар уюштурулганын билдирди.