БИШКЕК, 1-июл. — Sputnik. Мурунку президент Алмазбек Атамбаевдин абалы жалпы жонунан жаман эмес, өзгөчө кыйналгандыгын айткан жок. Бул туурасында Sputnik Кыргызстанга анын жактоочусу Сергей Слесарев билдирди.
Бүгүн адвокат мурунку өлкө башчы менен жолуккан.
"Учурда Атамбаев дарыланып жатат. Укол жана асма укол алып, дары ичип жатыптыр. Жалпы жонунан абалы дурус. Өзүнчө палатада экен. Бул анын тез сакайып кетишине жардам берет деген ниеттебиз", — деген Слесарев.
Эске салсак, Атамбаев 30-июнда пневмония дартына кабылып ооруканага которулганын УКМК кабарлаган.
Атамбаев менен Жолдубаева жазага тартылды. Сот залынан видео
Андан көп өтпөй социалдык тармактарда Атамбаевдин жакындары коронавирус УКМКнын тергөө абагында иштеген кызматкерлерде бар экен деген билдирүүлөр менен чыккан. Бирок буга Коопсуздук кызматы жооп берген.
Мурдагы президентке өткөн аптада кримтөбөл Азиз Батукаевди мыйзамсыз бошотуп берген деген күнөө менен өкүм чыгып, 11 жыл 2 айга эркинен ажыратылган. Аны менен кошо мүлкү конфискацияланып, мамлекеттик сыйлыктарынан ажыратуу каралган. Андан сырткары, Кой-Таш окуялары боюнча да кылмыш иши козголгон.
Батукаевдин иши
Кримтөбөл атыккан Азиз Батукаев 18 жылга эркинен ажыратылып, Нарындын №24 абагында отурган. Бирок 2013-жылы оор дартка кабылганына байланыштуу бошотулуп, Грозныйга учуп кеткен.
2014-жылдын 20-майында КР Жаза аткаруу мамлекеттик кызматы Батукаевге эл аралык издөө жарыялаган. ИИМдин маалыматы боюнча, учурда Батукаев курал-жарак сактаганы үчүн үч жылга кесилип, Чечен Республикасында жаза мөөнөтүн өтөп жатат.
Асрандиевден COVID аныкталып, дагы төрт министр обочолонду
2019-жылы апрелде Азиз Батукаевдин иши кайра жанданды. Анын бошотулушу боюнча бир катар мурдагы аткаминерлер менен дарыгерлер да суракка чакырылып, кээси камалган. Ал эми мурунку башкы прокурор Аида Салянова, ошол кездеги вице-премьер Шамил Атаханов жана саламаттык сактоо министри Динара Сагынбаева, мурунку башкы прокурор Индира Жолдубаева тергөө менен кызматташууга макул болуп үй камагына чыгарылган.