БИШКЕК, 18-июн. — Sputnik. Мамлекет башчы Сооронбай Жээнбеков бүгүн телефондон Казакстандын экс-президенти Нурсултан Назарбаевдин абалын сурап, тезирээк айыгып кетишин кааларын билдирди. Бул туурасында президенттин маалымат кызматынан кабарлашты.
Эске салсак, Назарбаевдин бүгүн COVID-19 инфекциясына чалдыкканы маалым болгон.
Жээнбеков Назарбаевдин эки өлкөнүн өнөктөштүк, коңшулук жана союздаштык жаатындагы кызматташууга кошкон салымын белгилеген.
"Алар коронавирусту жана анын кесепетин биргелешип гана жеңе ала турганын айтышты. Иш-аракеттер жарандардын ден соолугун сактоого жана мамлекеттердин экономикасын колдоого багытталышы керектиги белгиленди", — деп айтылат маалыматта.
Учурда Казакстанда коронавируска бир нече аткаминер чалдыкты. Алардын арасында президенттин маалымат катчысы, саламаттык сактоо министри, өкмөт башчынын орун басары жана депутат бар.