БИШКЕК, 17-июн. — Sputnik. Депутат Азамат Арапбаев демилгелеген банктарды пайда салыгынан бошотуу тууралуу мыйзам долбоору парламентте талаш жаратты.
Арапбаевдин айтымында, аталган мыйзам банктарды ирилештирүү, элдин ишенимин арттыруу жана минималдык уставдык капиталын 600 миллион сомго чыгаруу максатында жазылган. Бул үчүн банктарды пайда салыгынан бошотуу каралган. Документ үчүнчү окууда каралууда.
"2015-жылы Жогорку Кеңеш коммерциялык банктардын уставдык капиталын милдеттүү түрдө 600 миллион сомго жеткирсин деген мыйзам кабыл алганбыз. Ошол мезгилде ката кеткен. Биз азыр эгер тапкан пайдасын уставдык капиталына которсо, пайда салыгынан бошотууну сунуштап жатабыз. Эгер пайдасын акционерлер өзүнө бөлүштүрүп алса кадимкидей салык төлөйт", — деди Арапбаев.
Бирок бул мыйзам долбоорун эл өкүлү Зиядин Жамалдинов катуу сындап, артка кайтарууну сунуштады. Ал карапайым элди салыктан бошотуунун ордуна, мүмкүнчүлүгү болуп турган банктарга жеңилдик берүү акылга сыйбаган иш деп эсептейт. Себеби бул мыйзам ишке ашса, бюджетке жылына эки миллиард сом түшпөй каларын айтты.
"Эгер керек болсо мыйзамды өкмөт өзүңөр алып келгилечи. Депутаттар демилгелебесин. Бирөөнүн кызыкчылыгын түртүп жатат деп түшүнөбүз. Эгерде ушул мыйзам керек болсо өкмөт эмнеге өзүңөр алып чыккан жоксуңар?" — деди Жамалдинов.
Ага Арапбаев "мен мыйзамды адашып алып келип алыптырмын, сиз суранып жатасыз, мындан кийин алып келбей эле коёюн", - деп какшыктап күлдү.
Буга Жамалдинов "сиз адашпай эле, өз кызыкчылыгыңызды көздөп жатасыз" деп жооп кайтарды.
Андан соң Жамалдинов Салык кызматынын төрагасынын орун басары Айдай Карагуловага кайрылып, эгер мыйзам күчүнө кирсе бюджетке түшпөй калчу сумманы сурады. Анда ал бир эле банктан жылына 71 миллион сом пайда салыгы төлөнбөй каларын билдирди.
Мындан улам ал башка депутаттарга "ким эмнени түшүнбөй жатканын аңдап алгыла" деп кайрылды.