Өмүрүн киного арнаган Геннадий Базаров 78 жашка толду. Сүрөттөгү ирмемдери

Sputnik Кыргызстан агенттиги өмүрүн кино тармагына арнаган инсанды туулган күнү менен куттуктап, сүрөттөгү ирмемдерин сунуштайт.

Болочоктогу атактуу режиссёр 1942-жылы 14-майда Нарын облусунун Ат-Башы айылында жарык дүйнөгө келген. Мектепте окуп жүргөндө эле тасма тартуу иштерине кызыгып, ошондо өз алдынча фотоаппарат менен иштөөнү үйрөнө баштайт. Айылда окууну бүткөн соң элеттик жигит Фрунзеге келип "Кыргызфильм" киностудиясында катардагы жумушчу, ассистент болуп жүрүп, 1961-жылы Москвадагы Герасимов атындагы мамлекеттик кинематография институтуна тапшырган.

Геннадий Базаров 60 жылдан ашык убакыттан бери кинематография тармагында эмгектенип, "Каныбек", "Жаңылуу", "Буктурма", "Көчө", "Приют для совершеннолетних", "Айың", "Аномалия" өңдүү мыкты тасмаларын жараткан. Эң биринчи эмгеги катары саналган "Саманчынын жолу" тасмасын 23 жашында тарта баштаган. Жаш режиссёрго аны тартуу милдетин залкар жазуучу Чыңгыз Айтматов өзү жүктөгөн. Жыйынтыгында Базаровдун дипломдук иши 1967-жылы көрүүчүлөргө сунушталып, коомчулук тарабынан жакшы кабыл алынган.

Күчтүү сүрөтчү, мыкты сценарист, залкар режиссёр учурда пенсия курагында болгондугуна карабай "Кыргызтелефильмде" иштеп келет. Байбичеси менен эки кыз, бир уулду тарбиялап өстүргөн. Азыр түгөйлөр уул-кыз, неберелеринин сый-урматында.

Көптөгөн мамлекеттик жана эл аралык сыйлыктын лауреаты, "кыргыз кереметин" жаратуучуларынын көрүнүктүү өкүлү жөнүндө кызыктуу фактыларды Sputnik Кыргызстан агенттигинин материалынан окуңуздар.