БИШКЕК, 10-май — Sputnik. Бишкек, Ош жана Жалал-Абад шаарларындагы комендатуралар 10-майдын түн жарымында ишин токтоторун биринчи вице-премьер-министр Кубатбек Боронов айтты.
Боронов карантиндик тартип кирген шаар, райондордо иш жергиликтүү бийликке өткөрүп берилерин айтты. Маселен, борбор калаада Бишкек мэриясына же Жарандык коргонууга өтөрүн кошумчалады.
Ал комендатура ишин токтоткондон кийин ары-бери каттоо үчүн тиешелүү өткөрмө кагаздары керексиз болуп каларын билдирди.
Буга чейин Боронов шаардык штабдын чечими менен Чүй облусунда жана борбор калаанын тегерек-четинде жашап, бирок Бишкекте иштесе, жашаган жеринен маалым кат алышы керектигин айткан. Өкмөт ишканалардын жетекчилерине маалыматтарды Салык кызматынын кызматкерлери үчүн күбөлөндүрүшүнө мүмкүнчүлүк түзүп берерин айткан.
Sputnik Кыргызстан агенттиги өлкө аймагындагы абалга саресеп салып, тексттик баяндама жүргүзүп жатат.
Sputnik редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.