БИШКЕК, 1-май — Sputnik. Кыргызстандын алгачкы журналист кыздарынын бири Сулуубек Токсобаева 91 жаш курагында дүйнө салды. Бул тууралуу Маданият, маалымат жана туризм министрлигинен кабарлашты.
Ага ылайык, Токсобаева 1929-жылы Сокулук районундагы Жыламыш айылында туулган. 1946-жылы Фрунзедеги педагогикалык окуу жайын, 1959-жылы кыргыз мамлекеттик университетин аяктаган.
Эмгек жолун 1949-жылы "Ленинчил жаш" гезитинде баштаган. Токсобаева кыргыз сатирасына кыз-келиндерден биринчилерден болуп баш-оту менен кирип, журналист-сатирик катары таанылган.
Анын эмгектери бааланып, СССР жана КР Жогорку кеӊешинин ардак грамоталары, "Эмгектеги артыкчылыгы үчүн" мамлекеттик медалы менен сыйланган. 1983-жылы балдар үчүн "Эки таранчы" китеби жарык көргөн. "Табам, чагам", "Айланкөчөк" аттуу китептерге аӊгемелери жарыяланган.
Токсобаева Бишкектин Биринчи май райондук ардагерлер кеӊешинин мүчөсү болгон.