БИШКЕК, 21-апр. — Sputnik. Өлкөдөгү абалга карабастан дыйкан, фермерлер үчүн тоскоолдуктар болбошу керек. Бул тууралуу премьер-министр Мухаммедкалый Абылгазиев Чүйдөгү жазгы талаа иштери менен таанышып жатып айтканын өкмөттүн маалымат кызматы билдирди.
Ага ылайык, Абылгазиев айдоо иштери жүрүп жаткан Чүй облусунун Москва районуна барып, дыйкандар менен сүйлөшкөн.
"Коронавирус инфекциясы менен күрөшүүдө өлкө кандай кыйынчылыктарга туш болуп жатканын көрүп жатабыз. Саламаттыкты сактоо системасынын дараметинин начардыгынан тышкары, азык-түлүк коопсуздугу боюнча коркунучту сездик. Ошондуктан өзгөчө кырдаал жана өзгөчө абал режимдеринин алгачкы күндөрүнөн тарта жазгы талаа иштерин тиешелүү деңгээлде жана өз убактысында жүргүзүү тапшырмасын койгом", — деди өкмөт башчы.
Абылгазиев дыйкандарда күйүүчү-майлоочу май, үрөн, жабдуу техникаларды сатып алууда оорчулуктар болбошу керектигин баса белгиледи.
Ал Айыл чарба, тамак-аш өнөр жайы жана мелиорация министрлигине, ошондой эле жергиликтүү өз алдынча башкаруу органдарынын башчыларына жазгы талаа иштерин тийиштүү деңгээлде өткөрүүгө конкреттүү тапшырмаларды берген.
Коронавирустун кесепети
Кыргызстанда коронавирус жуктуруп алгандардын саны 590го жетти. Анын ичинен 216сы айыгып, жетөө каза болду. Ошондой эле 147 медицина кызматкери да оору менен алышууда.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Мындан тышкары, Sputnik Кыргызстан редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.