БИШКЕК, 15-апр. — Sputnik. "Жардам" штабына жергиликтүү өндүрүүчүлөрдөн 26 тоннадан ашык азык-түлүк келди. Бул тууралуу Республикалык штабдан кабарлашты.
Ага ылайык, берилген азык-түлүктөрдүн ичинде ун, күрүч, гречка, макарон, шекер, суу май, картошка жана башка тамак-аш азыктары бар. Мунун баары өлкөнүн ар кайсы аймактарындагы муктаж адамдарга таратуу үчүн бөлүштүрүлгөн.
"1227" ыкчам байланышына жана 1227.tunduk.kg порталына республиканын муктаж жарандарынан билдирүүлөр келип түшүүдө. Бүгүнкү күндө 144 433 үй-бүлө жардам алды", — деп айтылат маалыматта.
Эске салсак, Кыргызстанда аз камсыз болгон, тамак-ашы жок калган жарандарга көмөк көрсөтүү үчүн "Жардам" штабы түзүлгөн.
Жардамга муктаж жарандар 1227 кыска номерине чалса болот. Мындан сырткары, "Биз барбыз" Telegram-каналы, "Жардам берем" мобилдик тиркемеси жана Facebook тармагындагы "Жардам штабы" группасына билдирүү калтыра алышат.
Коронавирус кесепети
Кыргызстанда коронавирус жуктуруп алгандардын саны 449га жетти. Алардын ичинен 244ү аял, 205и эркек. Беш киши каза болду. Вирус аныкталгандардын басымдуу бөлүгү Ош жана Жалал-Абад облустарында жана Бишкек шаарында.
Өлкөнүн бир катар шаар, райондоруна киргизилген өзгөчө абал режими апрелдин аягына чейин узартылып, тизмеге Нарын шаары менен Ат-Башы району да кошулду.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.