Sputnik Кыргызстан маалымат агенттигинин "Ак жарык" рубрикасынын алкагында жашоодо жакшылыгын аябаган, ага себепчи болгон адамдардын окуясы жарыяланып келет. Бул ирет кайнежесинин кылган жакшылыгына ыраазы болгон келиндин окуясы баяндалат.
...Биз азыр үч баланын ата-энесибиз. Кудайга шүгүр, жашообуз жакшы. Өткөн турмушума кылчайып, бир адамга рахмат айткым келди. Ал адам кайнежем болот. Анын ошол кездеги колдоосуна, менин кетирген чекилигимди түшүнгөнүнө ыраазы болом.
Сабактарына барып үйрөнүп, баары жагып, кыялдана баштадым. Ага чейин тармактык маркетинг тууралуу маалыматым деле аз экен. Оюмда акча тапсам эле аны жүгүртүп бизнес жасайм деп жатам. Бассам-турсам акча таап, товар алып, сатып айлантуу болуп калды. Ошондой күндөрдүн биринде күйөөм машинасын сатып, акчасын үйгө алып келип койду.
Жолдошум Урмат намаз окучу. Жумушу убактылуу токтогондуктан көп өтпөй кырк күнгө дааватка кетип калды. Анан мени кудай урду. Күйөөмдүн катаал мүнөзүн билип туруп, жанагы акчаны алып, товар алып турууну чечтим. Жазгүлгө айтсам, ал дароо эле: "ой, күйөөң келгиче ордун тургузуп коёсуң. 200 доллар салсаң, дароо үчүнчү тепкичке көтөрүлөсүң, айлык чыгат", — деди.
Ал иштеп жүрдү. Мен акчанын ордун тургуза албай, товарларды өткөрө албай убара болдум. Же акча алганымды айта албайм. Баягы 300 доллар көздөн учуп, өзүмдү жеп салдым. Жазгүлдөн пайда жок. Акчанын айынан аны менен да уруша кеттим. Урматтан коркуп жүрөм. Анткени күйөөм башынан бир мүнөз, көк бет.
Ошентип кыйналып жүрсөм жолдошум үстүнө акча кошуп машина ала турган болуп калды. Ал тургай машина да таап, сүйлөшүп коюптур. Караса эле баягы акча кем чыкты. Биз үчүн 300 доллар чоң акча эле.
Күйөөм акча кайда деп сураганда тармактык маркетингге салганымды айтпай койдум. Кыскасы, аябай урушуп, жолдошум кол көтөрүп жиберди. Мен да тажаган жаным бир топ сөз айтып жибердим окшойт. Ыйлаган бойдон кайнежемдикине кетип калдым. Барып болгонун айттым. Оюмда кетем деп жатам. Анан эжем "эми болору болуптур, акчаны мен сурагам, сага айтпа дегем деп коёюн. Азыр сага 300 доллар берип турайын. Иштегенде берерсиң", – деди. Макул болдум. Эжем дароо Урматты чакырып, дасторкон үстүндө баарын түшүндүрүп акчаны карматып, акыл-насаатын айтып бизди жолго салды. Ичимен кубанганымды айтпа. Үстүмөн бир оор жүктү алып салгандай эле болду. Ошентип бир балээден кутулуп, экинчи тармактык маркетингге жологус болгом.
Бири-бирине душман болгон кайнеже-келиндерди деле көрүп жүрөбүз. Ошондойлорду уккан сайын тобо келтирип, бир тууган болуп калган кайнежеме сыйым ого бетер артат.
Кайнежемдин мага кылган жакшылыгына, адамгерчилигине рахмат айткым келди. Ыраазымын, эжеке!
Эгер сиз да ушундай жанга жагымдуу окуяны башыңыздан өткөрсөңүз же бирөөнүкүнө күбө болсоңуз news@sputnik.kg дарегине кат жазып, ыраазычылык билдирсеңиз болот.