БИШКЕК, 1-апр. — Sputnik. Ош шаары менен Кара-Суу жана Ноокат райондорунун коменданты Малик Нурдинов кошуна жайгашкан, бирок өзгөчө абал киргизилбеген райондордун тургундарына кайрылып, аймакка келбей турушун айтты.
Нурдинов беш райондун жашоочуларына кайрылган.
"Кара-Кулжа, Өзгөн, Чоң Алай, Алай, Араванда өзгөчө абал эмес, өзөчө кырдаал тартиби иштеп жатат. Бул райондордун тургундары бир жолду жапсаң кайра бир жол ачып, максатсыз, расмий өткөрмө кагазсыз өтүүгө аракет кылууда. Андай болбойт. Ошко, Кара-Сууга, Ноокатка келбегиле, өзүңөргө сак болгула. Айрым жерлерде контактниктер (оору менен байланышып калгандар) бар, алар экспресс-тесттен өтүп жатат, бүткүчө сабыр кылып чыдап туруу зарыл. Карантинди бузбаганга аракет кылгыла. Кооптуулукка кабылбагыла", — деди Нурдинов.
Коронавирус Кыргызстанда
Кыргызстанда коронавируска кабылган адамдардын саны 107ге (49у эркек, 58и аял) жетти. Анын ичинен Сузактын үч тургуну айыгып чыккан. Тилекке каршы, Ош облусунда COVID-19 жуктурган үч адамдын абалы оорлошуп, реанимацияда жатат.
Бишкек, Ош, Жалал-Абад шаарларында жана Сузак, Ноокат, Кара-Суу райондорунда 15-апрелге дейре өзгөчө абал жарыяланган. Кечки саат 20.00дөн 7.00гө чейин коменданттык саат киргизилди.
Ушу тапта өлкө ичинде абал кандай болуп жатканын Sputnik Кыргызстан жүргүзгөн тексттик баяндамадан билүүгө болот.