БИШКЕК, 28-мар. — Sputnik. Өзбекстанда коронавирустан экинчи адам көз жумду. Ал врач болуп туруп өз алдынча дарыланганын Sputnik Өзбекстан агенттиги Саламаттыкты сактоо министрлигине шилтеме берип жазды.
Ага ылайык, көз жумган бейтап 39 жаштагы эркек киши.
"Бүгүн коронавирустан экинчи адам өлүп, ал дарыгер экендиги белгилүү болду. Өлкөдө алдын алуу жана түшүндүрүү иштери жүргүзүлүп жаткандыгына карабай маркум ооруканага кайрылган эмес. Үйдө өз алдынча дарылануу менен алектенген", — деп айтылат маалыматта.
Көз жумган киши Өзбекстанда биринчи жолу коронавирус жуктурду деп каттоого алынган адам менен байланышта болгон. Ал 26-мартта оор абалда клиникага жеткирилген. Учурда дарыгер менен байланышта болгондор аныкталып жатат.
Коңшу өлкөдө коронавирустан биринчи жолу улгайган аял көз жумган.
Соңку маалыматтар боюнча, өлкөдө коронавирус жуктургандардын саны 104кө жетти.