Бала кезимде апам мени балет мектебине бербей коюп, балерина болом деген кыялым орундалбай калган. Бул тууралуу Кундуз Авашова Sputnik Кыргызстан радиосунун "Туяк" программасында маек куруп жатып билдирди.
Анын айтымында, апасы Саламат Садыкова өмүрүн толугу менен маданиятка арнап, ал жактагы өзү көргөн кыйынчылыктарга кыздарынын кабылуусун каалабай, кичинесинен аларды искусстводон бөлөк тармакты тандоого үндөп келген.
"Апам менин жана сиңдим Махабаттын искусство жаатына аралашып, өнөр адамы болууга ар дайым каршы чыгып келген. Ошондон улам экөөбүз тең ар башка кесипти тандадык. Мен филология, журналистика жаатына ыктасам, сиңдим котормочу болуп кетти. Бирок дээриңде чыгармачылык бар болсо аны ооздуктоо кыйын экен. Мындан улам мен дагы, сиңдим дагы көптөгөн ийримдерге барып, ар кандай кароо-сынактарга катышып жүрдүк. Буга апам да каршы болчу эмес, бирок ар дайым искусствону кесип катары тандабагыла деп эскертип турар эле. Кичине кезимде балерина болом деген кыялым бар болчу. Аны жүзөгө ашыруу үчүн апам экөөбүз балет мектебине атайын тандоо сынагына барганбыз. Мен ал конкурстан ийгиликтүү өтүп кеткем. Бирок документ тапшырып, мектепке киргени келгенде мени тандаган мугалим жок болуп калып, "жаш курагың өтүп кетиптир, бир класс ылдый окуган окуучуларга кошобуз" деп калышты. Аны уккан апам дароо мени ал окуу жайга берүүдөн баш тартып, кетип калдык. Ошондо окуйм, ошол жакта калам деп ыйлаганым эсимде. Бирок мен каалагандай болгон жок. Жөнөкөй мектепте окудум. Балалык кыялым орундалбай калып, көксөөмдү мектептеги иш-чараларга катышып, кийин жогорку окуу жайда да бийлеп, ырдап жүрүп ишке ашырдым десем болот. Азыр апама абдан ыраазымын, анткени кийин өзүм балалуу болгондо апамдын айткандарын жана чектөөлөрүн түшүнө баштадым. Көрсө ар бир ата-эне өзү көргөн кыйынчылыкка чүрпөсүн кыйбайт тура", — деди Авашова.
Ал ошондой эле апасынын чыгармачылыктан сырткары ашпозчулук өнөрү бар экенин белгилеп, үйдө мыкты кожойке экенин кошумчалады.