БИШКЕК, 27-мар. — Sputnik. Коомдук саламаттык сактоо башкармалыгынын жетекчиси Айнура Акматова брифинг учурунда дүйнөнүн кайсы мамлекеттеринде коронавирус жуктуруп алган кыргызстандыктар бар экенин айтып берди.
"Бириккен Араб Эмирлигинде бир жаран бар. Ал Жидда шаарында, 15-марттан бери дарыланып жатат, абалы канаттандырарлык. Пакистанда үч жаран бар. Испанияда дагы бир кыргызстандыктын анализи вирус жуктурганын көрсөттү", — деди Акматова.
Анын айтымында, бул жарандардын абалы тууралуу элчиликтер аркылуу кабар алынып турат.
Коронавирус Кыргызстанда
Бүгүн Кыргызстанда коронавирус жуктуруп алган адамдардын саны 58ге жетти. Жаңы учур Сузак (7), Өзгөн (3), Кара-Суу (1), Ноокат (1) райондорунда жана Ош шаарында (1) катталды. Вирус жуктуруп алгандардын ону аял, төртөө эркек киши.
Бишкек, Ош, Жалал-Абад шаарлары жана Ноокат, Кара-Суу, Сузак райондоруна 15-апрелге чейин өзгөчө абал киргизилген.
Учурда өлкө аймагындагы кырдаал тууралуу Sputnik Кыргызстандын тексттик баяндамасынан кабардар болуп туруңуз.