БИШКЕК, 18-мар. — Sputnik. Коронавирус жуктуруп алгандар менен жолугушкан Чүй облусунун беш тургуну табылып, карантинге киргизилди. Бул тууралуу Саламаттык сактоо министрлигинин маалымат кызматынан кабарлашты.
Бүгүн Жалал-Абад облусунун Сузак районуна өзгөчө кырдаал киргизилди. Анткени ал жактан Сауд Аравиядан кичи ажылыкка барып келген үч адам коронавирус жуктуруп алганы аныкталды.
Сураштыруу учурунда аларды ташып келген учак Бишкектеги "Манас" аэропортуна келип конгону жана Чүй облусунда жашаган туугандары тосуп алганы айтылган.
Министрликтен билдиришкендей, изделип жаткандар табылып, обсервацияга алынды. Бардыгы анализ тапшырышты.
Кыргызстанда учурда коронавируска байланыштуу абал кандай болуп жатканын Sputnik Кыргызстан агенттигинин тексттик трансляциясынан жана Телеграм-каналдан окуй аласыздар.