БИШКЕК, 15-мар. — Sputnik. UFC уюмунун президенти Дана Уайт россиялык Хабиб Нурмагомедов менен америкалык Тони Фергюсондун беттешин башка жакка өткөрүүнү пландап жатканын Р-Спорт жазды.
Мушкерлердин беттеши 18-апрелде Нью-Йоркто өтүшү керек болчу. Бирок жергиликтүү бийлик коронавирус коркунучунан улам массалык иш-чараларды токтоткон. Ошондой эле Невада штатынын Атлетикалык комиссиясы вируска байланыштуу уруш өнөрү боюнча спорттук турнирлерди өткөрүүгө тыюу салган. Буга карабастан ишемби күнү UFC башчысы Нурмагомедов менен Фергюсондун беттеши сөзсүз болорун жар салды.
"Бизде беттешти өткөрүүгө түрдүү варианттар болду. Анын ичинде Невада дагы бар эле, бирок ал жак дагы мелдештерди токтоткондуктан башка жактарды караштырып жатабыз. Жакын арада бул маселе чечилерине ишенем", — деген Уайт ESPN телеканалына берген маегинде.
Жакында эле Лас-Вегаста Хабиб Нурмагомедов атаандашы Тони Фергюсон менен көз караштар таймашын өткөрүп жатып анын утурумдук чемпион болгондо алган курун тээп салган.