БИШКЕК, 15-мар. — Sputnik. Казакстанда өзгөчө абал киргизилгендигине байланыштуу тойлорду өткөрүүгө тыюу салынды. Бул туурасында Sputnik Казакстан агенттиги жазып чыкты.
Коңшу мамлекеттин башчысы Касым-Жомарт Токаевдин маалымат катчысы Берик Уалинин айтымында, коронавирустун тарашынан улам эл көп чогулган майрамдар, турнирлер жана башка иш-чараларды өткөрүүгө тыюу салынган.
"Мындай иш-чараларды кийинчерээк өткөрүү сунушталат", — деген Уали.
Белгилей кетсек, Казакстандын президентинин чечими менен 16-марттан тарта 15-апрелге чейин өзгөчө кырдаал киргизилген. ӨК режиминде соода-сатык жана көңүл ачуучу борборлордун, кинотеатр, театр, көргөзмө жана башка эл көп топтолгон объектилердин ишмердүүлүгүн токтотуу чечими да каралган.
Казакстанда COVID-19 аныкталган биринчи учур 13-мартта катталган. Алгач ооругандар экөө болсо, бүгүн сегизге чейин өстү.