БИШКЕК, 13-мар. — Sputnik. Дүйнөнү аралаган COVID-19 коронавирус пандемиясына каршы тиешелүү катуу чаралар көрүлсө, ал 2020-жылдын июнь айынын соңунда бүтүшү мүмкүн. Бул туурасында China Press Кытайдын Саламаттыкты сактоо маселеси боюнча мамлекеттик комитетинин атайын эксперттик комиссиясынын башчысы Чжунь Наньшанга шилтеме кылып билдирген.
"Божомолго караганда, эпидемия бүт дүйнө боюнча июнь айына чейин тарайт. Коронавирус менен күрөшүүдө басым эми экспортко эмес, импортко каршы турууга жасалмакчы", — деди башкы эпидемиолог маалымат жыйында.
Ал муну менен катар эле Кытайга келгендерде оору билинбей өтүп жаткандыгын билдирген.
"Ооруп айыккандар арасында вирус экинчи ирет жуккандар бар, бирок алар боюнча көрсөткүч аз", — деп кошумчалады ал.
11-марттын түнүндө Дүйнөлүк саламаттык сактоо уюму коронавирус боюнча пандемия болгонун жарыялаган.
COVID-19
2019-жылдын декабрь айынын аягында Кытайдын Ухань шаарында белгисиз өпкө оорусу жайылып баратканы байкалган. Оору деңиз азыктарын саткан базардан тараган. Адистер дарттын козгогучу коронавирустун 2019-nCoV деп аталган жаңы тиби экендигин боолголошкон. Учурда ал дүйнөнүн 100дөн ашык өлкөсүнө тарап, жуктуруп алгандардын саны 126 миңден ашты. Алардын ичинен 4638 киши каза болуп, 68 284ү сакайды. Ал эми расмий маалыматтарда Кыргызстанда вирус жуктуруп алгандар жок.