Владимир Путин менен Режеп Тайип Эрдогандын сүйлөшүүсү алты саатка созулду. Натыйжада эки лидер Сириянын Идлиб провинциясында согуштук аракеттерди токтотууну чечип, макулдашуунун долбоорун эки өлкөнүн тышкы иштер министрлери тааныштырышты.
Согуштук аракеттер 6-марттын түнүнө тарта токтотулду. Мындан тышкары, Москва менен Анкара М-4 трассасынын жанынан коопсуздук коридорун уюштурмакчы. Анын туурасы түндүк менен түштүктү көздөй алты чакырымга созулат. Ал эми 15-марттан тарта биргелешкен көзөмөл башталат.
МГИМОнун аскерий-саясий изилдөө борборунун директору, тарых илимдеринин доктору Алексей Подберезкин Sputnik радиосунун эфиринде эки лидердин ортосундагы макулдашуунун маанилүүлүгүн айтып берди.
"Путин менен Эрдогандын сүйлөшүүсү принципиалдуу мүнөзгө ээ. Аларды ишке ашыруу өзүнчө кеп, өтө оор болот. Путин Эрдоган экөө чыр-чатакка катыштыгы барлардын баарынын жоопкерчилигин өздөрүнө алышты, бул өтө опурталдуу чечим. Идлибдеги согуштун башка катышуучулары Путин менен Эрдогандын айтканына көнүп берери арсар. Бирок кырдаалды Россиянын куралдуу күчтөрүнүн көзөмөлдөй турганы олуттуу мааниге ээ — бул эгер каалоо болсо өтө татаал маселелерди чечүүгө болот дегенди түшүндүрөт. Эпке келүүнүн өзү абдан жакшы жетишкендик", — деди Подберезкин.
Идлибдеги кырдаал
Жооп иретинде Анкара Сириянын түндүк-батышында согуштук операция баштай турганын жар салган. Буга чейин РФтин ТИМ башчысы Сергей Лавров Анкара Идлиб боюнча бир катар милдеттемелерин аткарбай койгонун айткан болчу. Мында Түркия оппозициянын өкмөт менен сүйлөшүүгө даяр бөлүгүн террорчулардан бөлбөй койгонуна доомат коюлду.