БИШКЕК, 3-мар. — Sputnik. 2019-жылы Кыргызстандын тышкы карызы беш кредитордун алдында көбөйдү. Мындай бүтүмгө Финансы министрлигинин сайтындагы маалыматтарды карап чыккан соң келүүгө болот.
Өткөн жылы тышкы карыз 25 миллион долларга көбөйүп, 3 миллиард 825,7 миллион долларды түзгөн.
2018-жылдын аягында Кыргызстан 21 мамлекет жана эл аралык уюмга карыз болчу. Ал эми былтыркы жылдын жыйынтыгы менен алардын тизмесине Европа инвестициялык банкы (карыз — 11,2 миллион доллар) кошулду. Аны санабаганда, Кыргызстандын карызы беш кредитордун алдында өсүп, калгандарында кыскарды.
Көбөйгөн карыз:
- Кытайдын "Эксимбанкы" — 59 миллион 150 миң доллар;
- "Ислам өнүктүрүү банкы" — 13 миллион 30 миң;
- "Евразия өнүктүрүү банкы" — 4 миллион 780 миң;
- Айыл чарбаны өнүктүрүү боюнча эл аларык фонд — 4 миллион 270 миң;
- Сауд өнүктүрүү фонду — 1 миллион 910 миң.
Ал ортодо ички бересе дагы төрт эсеге жогорулап кетти.