БИШКЕК, 26-фев. — Sputnik. Башкы прокуратура Кой-Таш окуясы боюнча козголгон кылмыш ишти карап чыгып, сотко жөнөткөнүн билдирди.
Эскерте кетсек, буга чейин аталган окуя боюнча күнөөлөнгөндөргө расмий айып тагылганы айтылган. Тизмеде мурунку президент Алмазбек Атамбаев баш болгон 14 киши бар.
Башкы прокуратуранын маалыматы боюнча, аларга Кылмыш-жаза кодексинин 11 беренеси боюнча айып тагылды:
- 39 ("Бийликти күч менен басып алууга аракет кылуу");
- 355 ("Бийлик өкүлдөрүнө күч колдонуу же коркутуу");
- 337 ("Тергөөчүнүн ишине тоскоолдук жаратуу");
- 244 ("Адамдарды барымтага алуу");
- 264 ("Массалык башаламандык");
- 130 ("Киши өлтүрүү");
- 130 жана 39 ("Киши өлтүрүүгө аракет кылуу");
- 253 ("Курал-жаракты мыйзамсыз айлантуу");
- 257 ("Ок атуучу курал-жаракты уурдоо");
- 338 ("Сотко чейинки өндүрүшкө байланыштуу күч колдонуу же коркутуу") беренелери.
"25-февраль күнү айып актыларынын копиялары күнөөлөнүп жаткан тараптарга тапшырылып, иш Биринчи Май райондук сотко өттү", — деп айтылат маалыматта.
Мындан тышкары, дагы беш киши тергөө менен кызматташууга макул болгондуктан, аларга карата козголгон иш өзүнчө өндүрүшкө алынды. Ушу тапта тергөө жүрүп жатат.
Кой-Таш окуясы
Белгилей кетсек, Алмазбек Атамбаев 2019-жылы 7-8-августтагы Кой-Таш окуяларынан соң камакка алынган. Учурда сегиз эпизод менен шектелип, УКМКнын тергөө абагында. Бул окуядан бир киши каза таап, 175 адам дарыгерлерге кайрылганы белгилүү болгон.