БИШКЕК, 19-фев. — Sputnik. Эл менен мамиленин жасалма түрдө бузулушунан улам Ат-Башыдагы логистикалык борборду сала турган компания долбоордон чыгууга аргасыз болуп жатканын билдирди. Негизсиз ызы-чууга кабылгандардын көп бөлүгүн жаштар түзгөнү өтө өкүнүчтүү. Мындай пикирин премьер-министр Мухаммедкалый Абылгазиев бизнес-түзүмдөрдүн жана донордук уюмдардын өкүлдөрү менен жолугушуу учурунда айтканын өкмөттөн билдиришти.
Өкмөт башчынын айтымында, инвестор өзүнө бир нече милдеттерди алган. Долбоор 15 миң жумуш орунун түзмөк, алдыңкы жогорку технологиялык өндүрүш киргизилип, бюджетке ири көлөмдөгү акча которулмак.
"Долбоор айлана-чөйрө үчүн кандайдыр бир тобокелдикти алып келген жок. Алыскы облустук жана жергиликтүү бюджеттер үчүн гана эмес, жалпы эле ата мекендик экономика үчүн дагы мааниси чоң болчу", — деген ал.
Абылгазиев өкмөт пайданы жана инвестордун милдеттерин кылдаттык менен аныктап, бул долбоорду ийгиликтүү жүзөгө ашыруу үчүн бардык шарттарды түзүүгө аракет кылгандыгын айткан.
Ал мамлекеттин эркин жана толук колдоосун сезгендиктен, инвестор ири масштабдуу курулуш иштерине даярдык көрүп, долбоорду ишке ашыруунун активдүү фазасына киришкендигин түшүндүргөн.
Өкмөт башчы бул кырдаал инвестицияны коргоо чөйрөсүндө, өзгөчө жергиликтүү эл, баарынан биринчи жаштар менен өз ара кызматташуудагы иштөөнүн айрым принциптерин кайра карап чыгуунун зарылдыгы бышып жетилгенин ачык эле көрсөткөнүн айткан.
Абылгазиев өкмөт мындан ары да өлкөгө ири инвесторлорду тартууну уланта берерин кошумчалаган.
Эске салсак, Ат-Башыга логистикалык борбор куруу чечими былтыр жыл аягында чыккан. Бирок жергиликтүү тургундардын каршылыгынан улам салынбай турганы маалым болгон. Логистикалык борборду кура турган "Ат-Башы Кыргыз-Кытай эркин соода аймагы" компаниясы долбоорду жабуу чечимин кабыл алган. Буга байланыштуу 200 гектар жерди 49 жылга ижарага берүү келишими жокко чыгарылган.