БИШКЕК, 10-фев. — Sputnik. Кытайдын түштүк-батыш тарабындагы Сычуань провинциясында H5N6 деп аталган куш тумоосу жайылгандыгы, бирок анын кишиге жуккан учуру каттала электиги кабарланды. Бул туурасында РИА Новости аталган өлкөнүн Айыл чарба министрлигине шилтеме кылып кабарлады.
Аталган окуя Наньчун шаардык округунун Сичун уездиндеги фермалардын биринде катталган. Фермадагы 2497 үй канаттууларынын 1840ы вирустан улам кырылып калгандыгы кабарланган.
Буга чейин февралдын алгачкы күндөрүндө коронавирус илдетинин очогу болгон Хубэй провинциясынын түштүк тарабы менен чектешкен Хунань провинциясында куш тумоосунун жогорку патогендүү H5N1 түрү аныкталганы кабарланган. Жергиликтүү бийлик илдетти жайылтпоо максатында 17,8 миң үй канаттуусун жок кылганы маалым болгон.