БИШКЕК, 6-фев. — Sputnik. Үч-Коргон ГЭСин модернизациялоо үчүн Азия өнүктүрүү банкынан 100 миллион доллар алуу пландалууда.
Буга чейин каржы министри Бактыгүл Жээнбаева менен банктын Кыргызстандагы туруктуу өкүлчүлүгүнүн башчысы Кэндис Мак Дэйган насыя келишимине кол койгон. Аталган макулдашууну ратификациялоо үчүн парламенттин кароосуна киргизилди.
Каражаттын 60 миллион доллары насыя, 40 миллиону грант түрүндө болот. Насыя 8 жылдык жеңилдетилген мөөнөт менен 32 жылга берилет. Пайыздык өлчөмү жеңилдетилген мөөнөттө 1 пайыз, андан кийин 1,5 пайыз болмокчу.
Техникалык экономикалык негиздемеге ылайык, ГЭСти модернизациялоого 160 миллион доллар керектелет. Бул үчүн Евразия өнүктүрүү банкынан кошумча дагы 45 миллион доллар кредит алынат. Калган 15 миллион долларды кыргыз өкмөтү тыштан келген жабдууларды жана кызматтарды салыктар менен жыйымдардан бошотуу түрүндө каржылайт.
"Электр станциялары" ишканасынын директору Айтмамат Назаров электр жабдуулары толугу менен алмаштырыла турганын билдирди.
"Модернизациялангандан кийин электр энергиясын иштеп чыгуу кубаты 180 мегаваттан 216 мегаваттка чейин жогорулайт. Иш негизинен электр-механикалык жабдууларды жана гидроагрегаттарды алмаштырууга, гидротехникалык курулмаларды реконструкциялоого, ГЭСтин суу сактагычын ылайлануудан тазалоого, плотинасын бекемдөөгө багытталат", — деди Назаров.
Консультантарды жана ишти аткара турган подрядчыны Азия өнүктүрүү банкы тендер аркылуу тандайт.
Үч-Коргон ГЭСи 1962-жылы ишке берилип, андан бери бир да жолу оңдоодон өткөн эмес. Ал Нарын дарыясынын төмөнкү агымында жайгашкан.