БИШКЕК, 5-фев. — Sputnik. Кытайлык адистер 2019-nCoV коронавирус инфекциясы менен күрөшүүдө россиялык препаратты сынап жатышат. Бул туурасында Россиянын саламаттык сактоо министринин орун басары Сергей Краевойго таянуу менен "Звезда" телеканалы билдирди.
"Кытайлыктар азыр бизден клиникалык изилдөөлөрдү өткөрүү үчүн триазавирин аттуу препаратты сатып алышууда", — деди ал.
Краевойдун айтымында, азырынча препараттын спецификалык антивирустук касиеттери так далилдене элек. Кытай Эл Республикасы дарынын натыйжалуулугун баалоо үчүн атайын сатып алып жатат.
Акыркы маалыматка ылайык, жаңы коронавирус жуктуруп алган 20 684 учур катталган. Андан 427 киши көз жумса, 726 бейтап айыккан. Вирустун бир нече өлкөгө жайылып кеткени маалым.
Дүйнөлүк саламаттык сактоо уюму (ДСУ) коронавирустун жайылышын эл аралык маанидеги өзгөчө кырдаал деп атады. Оорунун жайылуу деңгээли Кытайда абдан жогору, ал эми региондо жана дүйнөдө жогору бойдон калууда.
Коронавирустан улам Кыргызстан Кытай менен чек арасын жаап, аба каттамдарын токтоткон.