БИШКЕК, 27-янв. — Sputnik. Вице-премьер-министр Жеңиш Разаков Sputnik Кыргызстан агенттигинин кабарчысына Тажикстан менен жер тилкелерин алмашуу боюнча сүйлөшүүлөрдүн жүрүшү тууралуу маалымат берди.
Анын айтымында, Аркас (Көк-Таш айылынын жанында) менен Самаркандек айылынын жанындагы жер тилкесин алмашуу боюнча иштер жүрүп жатат.
"Эки тараптуу сүйлөшүүлөр болгон. Жер тилкелерин алмашуу боюнча жалпы түшүнүк бар, бирок бирдей пикирге келе элекпиз", — деди Разаков.
Январдын башында болгон чек арадагы чырдан кийин эки өлкөнүн вице-премьерлери жер тилкелерин алмашуу жагын карап баштаган.
Эки өлкөнүн топографиялык жумушчу тобуна 1-мартка чейин Баткен облусундагы Баткен району менен Тажикстандын Исфара шаарынын ортосундагы бир нече жерден окшош жана аянты бирдей тилкелерди өз ара алмашуу боюнча макулдашылган варианттарды иштеп чыгуу тапшырмасы берилген.