БИШКЕК, 21-янв. — Sputnik. Бишкектеги №3 балдар ооруканасына кайрылган аялдардын бири дарыгерди жулкулдатып, урушуп жаткан видео тарады.
Аталган видео “Короче” Telegram каналына жүктөлгөн. Кадрдан болжол менен 30 жаштагы аял сөгүнүп-сагынып барып ордунда отурган дарыгерди бир булкуп жибергенин көрүүгө болот. Ал “Түшүндүрүп айтсаң болбойбу?!” деп кыйкырган. Андан соң аны дарыгерлер жайгарып, бир киши сыртка чыгарып кеткен.
№3 балдар ооруканасынын башкы дарыгери Гүлнара Жанабилова окуя бүгүн, 21-январда, болгонун тастыктап, териштирүү иштери жүрүп жатканын билдирди.