БИШКЕК, 12-янв. — Sputnik. Facebook менен Instagram 3-январда авиасоккунун кесепетинен көз жумган ирандык генерал Касем Сулейманини колдогон постторду өчүрүп жатат. Бул тууралуу Facebook тармагынын өкүлүнө шилтеме берип CNN кабарлады.
Facebook өкүлүнүн түшүндүрмөсүнө караганда, мындай кадам АКШнын санкциялары менен байланыштуу. Тагыраагы, АКШ Ислам революциясынын коргоочулар корпусу жана анын жетекчилигин санкцияга киргизген.
Ал ортодо Тегеран бийлиги элин Instagram тармагына каршы бойкотко чакырып, посттору өчүрүлгөн колдонуучулар арызданчу портал ачып жатышат.
Ал эми Касем Сулейманинин өзүнүн баракчасын социалдык тармактын жетекчилиги былтыркы жылдын апрель айында өчүрүп салган. Буга ал жетектеген "Кудс" Ислам революциясынын коргоочулар корпусу террордук уюм катары "кара тизмеге" киргени себеп болгон.