БИШКЕК, 6-янв. — Sputnik. Кыргыз-казак чегиндеги "Ак-Жол" өткөрүү бекетинин курулушу январдын соңунда баштала турганын өкмөт башчы Мухаммедкалый Абылгазиев аталган жайды модернизациялоо жана реконструкциялоо маселеси боюнча өткөн кеңешмеде айтты. Бул тууралуу билдирүүнү өкмөттүн маалымат кызматы таратты
Абылгазиев "Ак-Жол" өткөрүү пунктунан эл, автоунаа, жүк көп өтөрүн белгилеп, бардык иштер өз мөөнөтүндө бүткөрүлүшү керектигине токтолду.
"Оңдоо иштери жүрүп жаткан маалда мамлекеттик чек арадан жөө өткөндөр үчүн убактылуу көпүрө куруу мүмкүнчүлүгүн караштыруу керек. Автотранспорт үчүн чек ара жабык болорун жана унаалардын агымы башка жакынкы көзөмөл-өткөрүү жайларына багыт аларын эске алып, чек арачылардын санын көбөйтүү керек. Бул иштер элге шарт түзүү үчүн жасалууда", — деди өкмөт башчы.
Анын айтымында, жасалган иштер бардык курулуш ченемдерине жооп бериш керек. Курулушту премьер-министр өзү көзөмөлдөйт.
"План боюнча өткөрүү жайы заманбап болуш керек. Мында кеңейтилген административдик блок гана эмес, спорттук шаарча, чакан кинологиялык борбор, катарга туруу аянты, унаа токтотуучу жай болуп, жол бети кеңейтилет. Чек ара — ар бир мамлекеттин дарбазасы, ошондуктан иш жогорку деңгээлде аткарылууга тийиш", — деди Абылгазиев.
"Ак-Жол" көзөмөл-өткөрүү жайын оңдоп-түзөө үчүн 2020-жылдын январь айынын соңунда жабуу пландалган. Бардык иштер аяктагандан кийин бул пункттун өткөрүү мүмкүнчүлүгү үч эсе жогоруламакчы. Бекетте бөлмөлөрдүн саны көбөйөт, алар аркылуу паспорт көзөмөлдөө иштери жүргүзүлүп, ошондой эле автотранспорт каражаттары текшерилет.