БИШКЕК, 2-янв. — Sputnik. Алматынын жанында болгон авиакырсыкта боюнда бар келинди өзүнүн денеси менен жаап сактап калган казакстандык Темирлан Кадауовго сыйлык тапшырылды. Бул тууралуу Sputnik Казакстан агенттиги жазып чыкты.
Кадауов 27-декабрдагы авиакырсык маалында эрдикке тете иш кылган. Ал учактын куйрук жагында отурган боюнда бар Гулим Акишеваны өзүнүн денеси менен жаап, андан соң аны эшикке аман-эсен алып чыккан.
Мындан сырткары, Темирлан жаракат алганына карабай Тез жардам кызматы, куткаруучулар келгиче башка жүргүнчүлөрдү кыйраган учактан чыгарууга жардам берген.
"Жигит бул сыйлыкка татыктуу. Биринчи кезекте ага өзүнүн эли ыраазы", — деп полициядан белгилешти.
Алматы шаарынан учуп чыккан аба лайнери өткөн жылдын 27-декабрында эртең менен кырсыктап, эки кабат имаратка кулаган. Анын кесепетинен 12 адам көз жумуп, 49 киши жаракат алган. Казакстанда 28-декабрь аза күтүү күнү деп жарыяланган.
Кыргызстандык хирург Сабыр Жумабеков авиакырсыктан жабыркагандарга операция жасоо үчүн Алматыга барган.