БИШКЕК, 31-дек. — Sputnik. БУУда таасирдүү сөз сүйлөп таанылган Гретa Тунберг узакка созулган депрессиядан кийин экологиялык маселелер боюнча иш алып барып баштаган. Бул тууралуу анын атасы Свантe Тунберг Би-Би-Си агенттигине маек куруп жатып билдирген.
Анын айтымында, оорудан улам кызы тамак жебей, мектепке да барбай калган. Ошондон кийин айлана-чөйрөнү коргоого кызыгып баштаган.
Гретанын атасы башында мындай ишмердүүлүктү анча жактырган эмес. Бирок азыр, өзүнүн айтымында, ал көбүнчө кызына байланыштуу фейк маалыматтар жана көрө албастар үчүн санаа тартат.
Андан тышкары, Сванте кызы Грета аны эт жебегенге көндүргөнүн кошумчалаган. Ошол эле учурда экоактивисттин энеси, ырчы Малена Эрнман учакка отуруудан баш тарткан.
Тунберг 24-сентябрда Бириккен Улуттар Уюмунун климаттын өзгөрүшү боюнча саммитинде экологиялык кризис тууралуу көзүнө жаш алып сүйлөп, чоңдорду ойго салгандан кийин таанылган.