БИШКЕК, 12-дек. — Sputnik. Милиция өзү менен бирге жашаган адамына бычак урду деп шектелген келинди колго түшүрдү. Бул туурасында Октябрь райондук ИИБдин маалымат кызматынан кабарлашты.
РИИБ: Бишкекте чогуу жашаган адамына бычак урду деп 24 жаштагы келин кармалды
© Фото / пресс-служба УВД Октябрьского района
Билдирүүгө ылайык, бычак жеген бейтап тууралуу маалымат милицияга 10-декабрь күнү саат 13:50дө Улуттук госпиталдан түшкөн. Анда Т.А. аттуу эркек кишиге "теринин үстүнөн кесилген жаракат" деген диагноз коюлганы белгилүү болгон.
Натыйжада Октябь райондук ИИБдин ыкчам-тергөө тобу бейтапка аны менен чогуу жашаган кыз бычак шилтегенин аныктаган. Алардын чатакташа кеткени белгилүү болгон.
Милиция издөө иштеринин натыйжасында 24 жаштагы А.Ж. аттуу келинди кармап, убактылуу тергөө абагына киргизген.
Аталган факт Жазык кодексинин 138-беренеси ("Ден соолукка оор залакка келтирүү") менен Кылмыш жана жоруктардын бирдиктүү реестрине каттоого алынды.