БИШКЕК, 24-ноя. — Sputnik. Кайгуул милициясы ишин 31-октябрдан тарта баштап, бүгүнкү күнгө чейин 102 номери аркылуу түшкөн маалыматтын негизинде 1114 жерге барып, 37 кылмыштын бетин ачкан. Бул туурасында Жол кыймылы коопсуздугун камсыз кылуу боюнча башкармалыктын жетекчисинин орун басары Нур Сатыбалдиев коомдук кеңештин жыйынында айтты.
Бишкек шаарында 31-октябрдан тарта Кайгуул милициясы расмий түрдө ишке киришкен. Алар азыр иштеп жаткан ЖКККББнын жана коомдук тартипти караган Кайгуул күзөт кызматынын ишин аткарат. Кайгуулчуларга белгиленген аймакты күзөтүп, укук бузуулар катталган жерге көз ирмемде барып калышы керек деген талап коюлган.
"1114 телефон чалуу болсо, анын 754 чындап кайрылуу, ал эми 360ы жалган болуп чыккан. 37 кылмыш, 89 бейбаштыктын бети ачылып, жалпысынан 975 протокол түзүлгөн", — деген Сатыбалдиев.
Свердлов районунун аймагы негизинен беш тилкеге бөлүнүп, беш багыт автоунаа менен, 15и жөө жүргөн кызматкерлерге бөлүнгөн.
Кайгуул милициясы үч сменде иштейт. Биринчиси саат эртең мененки тогузда башталып кечки беште аяктайт. Экинчи топ 17:00-01:00 аралыгында иштейт. Ал эми акыркы тобу ишке түнкү саат 1:00дөн тарта киришет да, эртең мененки тогузга чейин болот.