БИШКЕК, 12-ноя. — Sputnik. Ишкер Айэркен Саймаитини өлтүрдү деген шек менен кармалган үч кишинин экөө Кыргызстандын жарандары деген маалыматты КР Тышкы иштер министрлиги текшерип жатат. Бул тууралуу ТИМден кабарлашты.
Түркиялык ЖМКлардын жазганына караганда, шектүүлөр Адана аймагынан Сирияга өтүп кетүүгө аракет кылган маалда колго түшкөн. Шектүүлөр сурак учурунда Айэркен Саймаитини Кыргызстандагы аласа-бересе маселелеринен улам өлтүрүшкөнүн айтышкан.
Окуя болгон аймактан алыс эмес жерде токтоп турган консулдукка таандык 34 CC 2092 номерлүү Range Rover үлгүсүндөгү автоунааны укук коргоо органдары алып кеткен. Кыргызстандын Тышкы иштер министрлиги аталган жол тандабас Стамбулдагы башкы консул Эркин Сопоковго таандык экенин ырастап, ал президенттин жарлыгы менен кызматтан алынган.