КАРАКОЛ, 3-окт. — Sputnik. Ысык-Көл облусунун Каркыра айылындагы Советтер Союзу учурунда салынган мончонун бир бөлмөсүндө башталгыч класстын окуучулары окуп жатат.
Ж. Асылбаев атындагы мектептин өзү чек арадагы Сан-Таш айылында жайгашкан. Эки айылдын ортосу 17 чакырым. Аталган мектеп ӨКМ жана жергиликтүү бийлик тарабынан облус аймагында авариялык абалда деген 24 мектептин бири.
Мектепте филиалды кошкондо 58 бала окуйт. Башталгыч классты аяктагандар окуусун Каркыра айылынан башка аймактарда улантат.
Советтер Союзу учурунда мончо болгон имараттын бир бөлүмүндө фельдшердик-акушердик пункт жайгашкан. Ал жактын вентиляция системасын алмаштырып, ашкана куруу керек. Спорт зал болбогондуктан кышында дене тарбия сабагы класста өтүлөт.
Башталгыч класстардын мугалиминин бири Чолпон Туратованын айтымында, мектеп өтө эле чакан. Андыктан 1-3-класстар үчүн жана 2-4-класстар үчүн сабакты бир мугалим берет. 45 мүнөт ичинде мугалим эки класска эки жаңы тема өтүшү керек.
"Бул биз үчүн да, окуучулар үчүн да, албетте, оор. Жалпысынан бизде азыр 13 окуучу бар. 1-класста бир окуучу, үчөө 2-класста, 3-класста да үчөө жана 4-класста алты окуучу бар", — деди ал.
Жергиликтүү тургун Урмат Курмановдун 1-класста баласы окуйт. Ал үч жылдан кийин баласын башка айылдан окутушу керек.
"Балам башка жакка деле көпкө кете элек, бизди сагынат го. Дагы жакшы ал жакта тааныштарыбыз бар, алар да балдарын туугандарыныкына же тааныштарына жиберишет", — деди ал.
Бирок ал жакта да 9-класска чейин эле билим берилет. Балдар 10-11-классты дагы башка жактан бүтүшөт.
Ал эми Сан-Таш айыл өкмөтүнүн башчысы Орозбек Жапаров жаңы мектеп салуу керектигин, бирок ага айылдын күчү жетпей турганын айтты. Ал ошондой эле быйыл аймактарды өнүктүрүү жылынын алкагында Каркыра айылына 100 орундуу мектеп салуу үчүн каржылоо каралганын кошумчалады. Акча Ысык-Көлдү өнүктүрүү фондусунан берилет. Жергиликтүү тургундар 2020-жылы жаңы мектептин курулушу башталат деп ниет кылышууда.