Кичинекей баласын көтөрүп алып кайыр сураган кишинин видеосу социалдык тармактарга чыгып, кызуу талкуу жараткан болчу.
Социалдык кызматкерлер үй-бүлөнүн турмуш шарты менен таанышуу үчүн үйүнө барышкан.
Sputnik Кыргызстан маалымат агенттигинин кабарчылары да талкууга алынган үй-бүлөгө барып, алардын көчөдө кайыр сурашына эмне себеп болгонун тактап келишти.
Айдоочулардан акча сураган Таалайбек Ушумбаев 51 жашта. Ал төрт уулдун атасы. Бала кезинде менингит оорусуна чалдыгып, кулагы укпай, сүйлөбөй калганын кагазга жазып, кабарчыга түшүндүрүп берди. Жубайы да майып.
Ушумбаев кесиби боюнча темир уста экен. Акыркы иштеген жеринде маянасы 3000 сомдон ашпагандыктан жумушун таштап койгонун айтат. Учурда башка иш караштырып, бирок майнап чыкпай жатканын билдирди.
Анын үй-бүлөлүк кирешесин ай сайын берилчү 8000 сомго жетпеген жөлөк пул түзөт экен.
Учурда чүрпөсүнүн дары-дармегине 20 000 сом керек болгондуктан көчөгө чыгып кайыр сурагандан башка амал калбаганын билдирди. Айтымында, Микаэлге тез арада жардам көрсөтүлбөсө, илдети өтүшүп кетиши ыктымал.
Sputnik кабарчысы аталган бүлөгө барганда үй кожейкеси социалдык кызматкерлер менен кеткени белгилүү болду.