БИШКЕК, 25-сен. — Sputnik. Кыргызстанда инвестициялык климат жагымдуу боло баштаганын премьер Мухаммедкалый Абылгазиев "Евразия жумалыгы" форумунун ачылыш аземинде айтты.
Аталган иш-чара 2-сентябрда Бишкектеги "Ала-Арча" мамлекеттик резиденциясында өтүп жатат. Аблгазиев өз сөзүндө Кыргызстан ЕАЭБдеги позициясын чыңдап жатканына токтолду.
"Кыргызстан — чоң мүмкүнчүлүктөрдүн өлкөсү. Ал ак иштеп, акча табам дегендер үчүн ачык. Жакында эле бизнес-омбудсмен институтун түздүк. Текшерүүгө эки жылга чейин мораторий киргизилди, ишкерлерди тейлей турчу борбор ачылды. Аймакта бизнес баштагысы келгендер төрт салыктан бошотулду. Алар: сатуудан алынган салык, киреше салыгы, жер салыгы жана кыймылсыз мүлк салыгы. Мындай чечим Кыргызстанда биринчи жолу кабыл алынды", — деди Абылгазиев.
Ал ошондой эле Кыргызстан эл аралык Doing Business рейтингинде өз позициясын жакшыртып жатканын белгиледи.
25-27-сентябрда Бишкектеги "Ала-Арча" мамлекеттик резиденциясында "Евразия жумалыгы — 2019" ишкер-форуму өтүп жатат. Бул иш-чара 2016-жылдан бери ЕАЭБге кирген мамлекеттердин борбор калааларында болуп келет.