БИШКЕК, 24-сен. — Sputnik. Дарыгерлер айрым дары каражаттарын аралаштырып ичүү кооптуу экендигин, жадакалса өмүргө коркунуч жаратарын далилдешти. Бул тууралуу "Известия" жазды.
Ага ылайык, жөтөлдүн дарысы менен аллергиялык препаратты кошуп ичүүгө болбойт. Себеби экөөнүн курамы окшошураак келгендиктен, организмге ашыкча болуп калат. Биринчи белгилери катары адам шалдырап, уйкусурайт.
Ошондой эле дарыгерлер депрессияга каршы дарылар менен ооруну сездирбөөчү препараттарды бирге колдонуу, ашказанды канатып жибериши мүмкүндүгүн айтышкан. Андан тышкары, илдетти жооткото турган жана адамды тынчтанууга жардам берген дарылар менен аспириндин, антикоагулянттардын биригиши инсультка, андан тышкары ичеги-карындардын канашына алып келет.
Эң эле кооптуусу - тынчтандырууга көмөк көрсөткөн дарылар менен ооруну сездирбөөчү препараттардын аралашмасы. Адистер алардын курамы жүрөк жыйрылышына терс таасир берерин айтышкан.