БИШКЕК, 20-сен. — Sputnik. Оренбург облусунун "Донгуз" полигонунда Сооронбай Жээнбеков менен Владимир Путиндин өзүнчө жолугушуусу болду. Бул тууралуу Кремлдин сайтында маалымдалат.
Жолугушууда Путин Кыргызстан аскерлеринин "Центр – 2019" машыгууларына катышып жатканы абдан маанилүү экенин белгиледи. Россиянын президенти бул машыгуулар аскер куралдуу күчтөрүнүн ар кандай окуяларга даяр болушун шарттай турганын кошумчалады.
"Биз ар кандай себеп менен түрдүү жерлерде кездешип жүрөбүз, бирок биргеликте машыгуу өткөрүү өзгөчө себеп. Бардык тармакта кызматташууну улантып жатабыз. Эң башкы маселе катары экономикалык жактан кызматташууну талкуулап келебиз. Ал да жакшы өнүгүүдө. Былтыр 17 пайызга өсүш болсо, быйыл андан да көбөйүп жатат", — деди ал.
Путин ошондой эле аскерий техникалык жактан кызматташуу жакшы жолго коюлуп жатканын белгиледи. Аны менен катар бул машыгууга 128 миң аскер жана 600 учуучу техника тартылганын айтты.
Өз кезегинде Сооронбай Жээнбеков Владимир Путинге ыраазычылыгын билдирди.
"Жолугушуулардын байма-бай өтүп жатканына кубанычтабыз. Бул сиздин эмгегиңиз. Ишиңиздин көптүгүнө карабай бардык нерсеге убакыт бөлүп келесиз. Аскердик машыгуунун ийгиликтүү аякташы менен куттуктайм. Чакырганыңыз үчүн рахмат", — деди Жээнбеков.
Ал, андан сырткары, аскерлердин эки тараптуу активдүү кызматташып жатканын белгилеп, Кыргызстан менен Россия ишенимдүү дос, өнөктөш экенин билдирди. Ошондой эле Кыргызстан Россия менен болгон келишимдерди аткарууга дайыма аракет кылып келгенин жана ал боюнча такай иштер жүрө турганын айтты.