БИШКЕК, 19-сен. — Sputnik. Балбандардын сап башы Айсулуу Тыныбекова дүйнө чемпионатынын жарым финалында түндүк кореялык Йонг Сим Римди 8:0 эсеби менен утуп, финалга чыкты. Бул тууралуу Бириккен күрөш федерациясынын (UWW) расмий сайтында көрсөтүлдү.
Казакстандын Нур-Султан шаарында күрөш түрлөрү боюнча дүйнө чемпионаты өтүп жатат. Ал Токиодо өтө турган Олимпиада оюндарына жолдомо берчү турнир болуп эсептелет.
Спортчу алгачкы кармашында мексикалык Алехандра Ромеро Бонильяны 8:0 эсеби менен утса, 8/1 финалда япониялык Юкако Каваини таза жеңиш менен жеңген. Ал эми чейрек финалда украиналык Юлия Ткачты 9:6 эсеби менен жеңип, Олимпиада оюндарына лицензия алган.
Эске салсак, ири турнир 14-сентябрда башталган, эми 22-сентябрда жыйынтыкталат. Буга чейин грек-рим күрөшүнүн балбандары күчүн сынап, Атабек Азисбеков гана бешинчи орунду алып, Токио Олимпиадасына жолдомо алды.