Сүйлөшүүлөр уланууда. ЖК чек ара боюнча өкмөттүн маалыматын эртең укмай болду

БИШКЕК, 18-сен. — Sputnik. Жогорку Кеңеш кыргыз-тажик чек арасындагы жаңжал боюнча өкмөттүн маалыматын 19-сентябрда парламенттин жалпы жыйынында биринчи маселе кылып карай турган болушту.

Буга чейин эл өкүлдөрү өкмөттүн маалыматын бүгүн, 18-сентябрда, саат 14:00дө карайбыз деп добуш беришкен болчу.

Депутат: чек арада кемпир-чалдар эле калды

18 Аяк оона 2019, 12:21

Төрага Дастан Жумабеков премьер Мухаммедкалый Абылгазиев менен сүйлөшкөнүн, ал учурда вице-премьер Жеңиш Разаков баштаган тийиштүү органдардын жетекчилери менен жаңжал чыккан аймакта жүргөнүн жана Тажикстандын да тийиштүү өкүлдөрү менен сүйлөшүүлөрдү жүргүзүп жатканын айтты. Спикер ошондой эле Абылгазиев сүйлөшүүлөрдүн жыйынтыгы кандай болгонун жана жаңжалдын чыгышы боюнча 19-сентябрда эртең менен кенен маалымат берүүнү өтүнгөнүн кошумчалады.

Депутаттардын добушу менен кыргыз-тажик чек арасындагы кырдаал 19-сентябрда парламенттин жалпы жыйынында биринчи маселе болуп каралмай болду.

Белгилей кетсек, 16-сентябрь күнү кечке жуук кыргыз-тажик чек арасында чыр чыгып, коңшу өлкөнүн чек арачылары Лейлек районундагы Максат жана Сай бекеттерине ок аткан. Анын кесепетинен бир жоокер каза таап, 13 киши жарадар болгон. Алардын ону Бишкектеги Травматология жана ортопедия борборуна алып келинсе, үчөө Лейлектеги ооруканада калды. Алардын бири комада жатканы кошумча кабарланган.

Ал эми Тажикстан тараптан үч адамдын каза тапкандыгы айтылган.

Кызыктуу жана маанилүү жаңылыктарды алгачкылардан болуп билгиңиз келеби?
Биздин Telegram-каналга жазылыңыз.