БИШКЕК, 17-сен. — Sputnik. Премьер-министр Мухаммедкалый Абылгазиев Лейлек районундагы Максат айылынын жашоочулары менен жолугуп, чек ара маселесин жөнгө салуу көңүлдүн борборунда тургандыгын айтты. Бул тууралуу өкмөттүн маалымат кызматынан кабарлашты.
Премьер-министр айылдагы чек ара чырынан улам түзүлгөн абал менен таанышкан.
"Сиздер күн сайын чек ара маселелери, кээде урушка чейин жеткен учурлар менен бет келип, татаал шартта жашап жатасыздар. Сиздердеги туруктуулукка, эр жүрөктүүлүккө, чыдаган сабырыңызга, патриоттуулукка ыраазылык билдирем. Мамлекет үчүн чек ара маселелерин чечүү биринчи орундагы маанилүү жагдай. Бирок, тилекке каршы, бул бир жактуу процесс эмес", — деген Абылгазиев.
Өкмөттүн мамлекеттик чек араларын делимитация, демаркациялоо иштерин күчөтүп, талаш тилкелер боюнча пайдалуу макулдашууга жетүүгө аракеттенип жатканы айтылды.
Абылгазиев Максат чек ара постуна барып, өздүк курам менен маектешти.
Премьер-министр Кыргызстандын Мамлекеттик чек ара кызматынын атайын даярдыктагы "Бөрү" отрядынын аскер кызматчысы Равшан Муминовдун аскердик милдетин аткарууда курман болгондугуна байланыштуу туугандарына жана жакындарына көңүл айтты.
"Тилекке каршы, тынч заманда биздин аскерибиз каза таап, башкалары жаракат алышты. Бардык жабырлануучуларга зарыл көмөк көрсөтүлөт. Мен силердин өлкө үчүн өтөгөн кызматыңарга, мекенчилдигиңерге жана кайраттуулугуңарга ыраазымын", — деди Абылгазиев.
Өкмөт башчы тажик тарап биринчи болуп ок чыгарган чек арадагы окуяда миномёт менен автоматтын огунан зыянга учураган бекеттин инфраструктурасын көрүп чыкты. Андан соң Чек ара кызматынын тийиштүү жетекчилери менен жыйын өткөрдү. Чек ара аймактарында кырдаалды курчутпоо жана чыңалууну басаңдатуу үчүн чараларды кабыл алуунун, ошондой эле чек ара аймактарынан күчтөрдү чыгаруунун зарылдыгын белгиледи. Буга байланыштуу тараптар эки өлкөнүн ыйгарым укуктуу делегацияларынын ортосунда сүйлөшүү жүргүзүүнү демилгелешти.
Эске салсак, 2019-жылдын 16-сентябрында кечке жуук тажик чек арачылары Лейлек районундагы Максат жана Сай чек ара бекеттерине ок аткан. Анын кесепетинен бир аскер каза болуп, 13 кишинин жаракат алганы кабарланган. Жабырлануучулардын жетөө аскер кызматкери болсо, алтоо — жай тургундар. Баарына медициналык жардам берилип, Исфана шаарындагы райондук ооруканадан 10 бейтап Бишкекке учак менен алып келинди. Эки аскердин абалы оор.