БИШКЕК, 30-авг. — Sputnik. Жалал-Абад шаарынын мэри Мураталы Тагаев бир тууган агасы Абибила Тагаевди "Газпром Кыргызстан" ишканасы куруп берген Дене тарбия жана ден соолукту чыңдоо борборуна директор кылып дайындаган. Тиешелүү буйруктун көчүрмөсү Sputnik Кыргызстан агенттигине келип түштү.
Анда 2019-жылдын 10-апрелинен тарта Абибила Тагаев директордун милдетин аткаруучу болуп дайындалганы көрсөтүлгөн.
Мэриянын Уюштуруу иштери бөлүмүнүн башчысы Малика Мустапакулова Sputnik Кыргызстан агенттигине мэрдин агасы кызматка дайындалганын ырастады.
"Апрель айында Абибила Тагаев Дене тарбия жана ден соолукту чыңдоо борборунун директорунун милдетин аткаруучу болуп дайындалган. Ал комплекстин жобосун жана штаттык бирдигин түзүп, шаардык кеңештин депутаттарынын кароосуна киргизген. Үч айдан кийин мэр Мураталы Тагаевдин буйругу менен директорлук кызматка бекитилген", — деди Мустапакулова.
Андан мурдараак Тагаев өзүнүн мончосунда айылдык кеңештин депутатын сабап койду деп арыз түшкөн.
Мураталы Тагаев Жалал-Абад шаарынын мэри болуп 2018-жылдын 11-июнунда шайланган. Ага чейин шаардык кеңештин төрагасы болуп иштеп турган.