Кыргызстандын аймагындагы бул 346 айылга башынан эле таза суу системасы киргизилген эмес.
Sputnik Кыргызстан агенттиги өлкөнүн кайсы облусунда таза сууга муктаж айылдар көп экенин билип көрдү. Ошондой эле өмүр бою таза суусу жок, арыктан суу ичкен айылдардын тизмесин сунуштайт.
Ичүүчү суу менен камсыздоону жана суу агындылоону өнүктүрүү департаментинин бул таблицасында таза суу системасы өмүрү кирбеген айылдар көрсөтүлгөн. Анын ичинен Жалал-Абад облусунда 121 кыштак таза суусу жок отурат. Ош облусунда 102, Баткенде 83 айыл таптакыр таза суусуз калса, Нарында 19ду түзөт. Ал эми Ысык-Көлдө 10, Таласта 11 айылга таза суу системасы такыр эле кирген эмес. Чүй облусунда таза суу системасы кирбеген бир да айыл жок. Анткен менен союз убагында салынып, бирок эскилиги жетип калгандыктан, таза суусуз калган айылдар бар.
2023-жылга чейин бардык айылдар таза суу менен камсыз болот
Ичүүчү суу менен камсыздоону жана суу агындылоону өнүктүрүү департаментинин жетекчисинин орун басары Сайпидин Момуновдун айтымында, 2023-жылга чейин приоритеттүү делген 653 айылга толугу менен таза суу системасы киргизилет.
"Таза суу маселеси боюнча Кыргызстандагы 1819 айылды төрт топко бөлгөнбүз. 1-топтогу айылдарга таза суу 1950-70-жылга чейин киргизилген. Экинчи топтогу айылдарга таза суу 1970-90-жылдары берилсе, 3-топтогу айылдар 1990-жылдан 2000-жылга чейин камсыз болгон. Ал эми 4-топтогуларда такыр эле таза суу жок. Ушулардын ичинен 1инчи жана 4-топтогу айылдарды приоритеттүү деп тапканбыз. Башкача айтканда, тез аранын ичинде эки топко кирген 653 айылга таза суу системасы киргизилип, эскилиги жеткендер оңдолушу керек", — Момунов.
Адис учурда бул маселени чечүү үчүн каржы булактар табылып жатканын кошумчалады.
Эске салсак, ушул жылдын май айында президент Сооронбай Жээнбеков 608 айылды таза суу менен камсыз кылуу үчүн 34 миллиард сом керек экендигин айткан.
Президент өлкө боюнча жалпы 653 айыл таза сууга муктаж экенин, анын 45инде маселе чечилип, калган 608 айылдын көйгөйү беш жыл ичинде чечилерин баса белгилеген.
Ажо мөөнөтү аяктаганга чейин өлкөнүн бардык аймагын таза суу менен камсыздайм деп убада берген.