БИШКЕК, 15-авг. — Sputnik. Биринчи Май райондук соту бүгүн, 15-августта, экс-башкы прокурор Аида Салянованы үй камагына чыгарды. Бул маалыматты Жогорку Кеңештин депутаты Алмамбет Шыкмаматов тастыктады.
Ал эми ИИМдин маалымат кызматы Салянова тергөө иши менен кызматташуу ниетин билдиргенин кабарлады. Буга байланыштуу мыйзамга ылайык, Салянованы камакка алуу чечими өзгөртүлүп, үй камагына чыгарылды.
Белгилей кетсек, Салянова кримтөбөл Азиз Батукаевдин Кыргызстандан чыгып кетиши боюнча козголгон кылмыш иштин алкагында 5-июнда камакка алынган. 15-июнда ден соолугуна байланыштуу Мирсаид Миррахимов атындагы Улуттук кардиология жана терапия борборуна жеткирилген. Дарыгерлер консилиумдан кийин "Салянова ооруканада болушу керек" деген чечим чыгарып, анын жүрөк-кан тамыр илдеттери менен жабыркай турганын маалымдашкан.
29-июнда ооруканадан №1 тергөө абагына кайрадан которулган. Салянова Бишкектин Биринчи Май райондук сотунун чечими менен 26-августка чейин тергөө абагында калтырылган болчу.
31-июлда ЖАМК Салянова Кыргызстанда операция жасатуудан баш тарткандыгын билдирип, кийинчерээк экс-прокурордун адвокаты буга түшүндүрмө берген.