БИШКЕК, 8-авг. — Sputnik. Кой-Таш айылында Алмазбек Атамбаевдин тарапташтары кармап жаткан спецназ жоокерлерине медициналык жардам көрсөтүлүүдө. Бул тууралуу Саламаттык сактоо министрлигинин маалымат кызматы билдирди.
Алардын абалы орто деп бааланууда.
"Жеринде Арашан айылынын дарыгерлик жалпы практика борборунун медиктери нөөмөттө турат. Ал жерде кармалып турган алты спецназ жоокерлерине жардам көрсөтүлдү. Экөөнө ок тийиптир, биринин бутуна, экинчисинин санына. Калган төртөө дагы ар кандай жаракаттарды алышкан", — деп айтылат билдирүүдө.
Эскерте кетсек, 7-августта УКМК Алмазбек Атамбаевди кармоо операциясын ишке ашырууга аракет кылып, атайын даярдыктагы бөлүмдүн жоокерлери Кой-Таштагы үйүн басып кирген. Натыйжада эл менен кагылышуу болуп, операция ишке ашпай калган. Атышуудан 50дөн ашык киши жабыркап, спецназдын бир жоокери каза тапкан.
Учурда Sputnik Кыргызстан агенттиги тексттик трансляция жүргүзүп жатат.